《一個婚禮 兩個葬禮》
今個暑假，確實發生了許多事情。
每個周末都見證人生幾乎必經之路。呢短短三個星期，就已經出席咗一個婚禮，兩個葬禮。
今個星期意佬嘅大姨媽走了。
由細到大，大姨媽同大姨丈對意佬愛護有加。
記得3月返嚟時，大姨媽一如既往用佈滿又青又紫血管的手緊握我同意佬雙手叫我哋返親嚟一定要去探佢。一臉慈愛滄桑，大概近幾年進出醫院太多次，望著我同意佬菊瓣似的笑容未免掩蓋不過大姨媽幾經一波三折從生死邊緣徘徊的空洞眼神。
"大姨媽，我哋返咗嚟喇……“
似乎佢仲未聽得見，但我同意佬呢晚喺大姨丈家中守夜，從仍掛在牆上大姨媽入院前仲用緊嘅浴袍，木柄梳上倘留著的幾絲銀髮，仿佛大姨媽仍活在呢間屋裡面。佢生前最喜愛坐喺火爐邊聽意佬講故仔，可惜或要再等幾十年先可以再喺火爐前相聚。
意佬多謝我咁有耐性一直陪伴住大姨媽，我話呢個係我嘅份內事。愛屋及烏，大姨媽本身就係一個我好敬愛嘅長輩，而且作為意大利人妻嘅我，早已將意佬屋企人視為我自己家人般看待。
雖然我講完呢句「好彩咁啱返到嚟出席大姨媽葬禮」會俾老人家話我大吉利是lur口水講過，但我堅感恩慶幸可陪伴大姨媽走埋最後一段路。近月香港每日發生嘅事情都教曉我四個字「世事無常」，今日看似風平浪靜，但原來「平安」可以咁奢侈。我哋要努力為自己所愛的人振作下去，陪伴亦然。當你跌倒嘅時候，只少還有我扶持。
大姨媽，抱歉由醫院太平間陪到你返屋企，直至封棺目送你離開自己屋企嗰刻我喊到9彩，有啲失儀態嚇親啲鄉親父老。受過眾人的祝福，神父安東尼把提爐內的乳香在你身傍擦得香噴噴的，隨著焚香嘅煙霧將我哋嘅祈禱帶上天庭，相信你已登天國。放心吧！我哋下次返嚟一定會探大姨丈同埋探你😊
#一個婚禮兩個葬禮
#意大利人妻日常
#世事偏偏無常
Search